MIMÉ NOKKÉ YENAMDÉ
Mimé no asin rémagné
Asi bitkolo bidmínla:né
Ésar sarkolo sarmínla:né,
Gimur kísapé asin éssa:né
Rémag pésagé nokké mé:lodde.
Murkong ngasodé a:yém okumlo
Nom Ki:né Moné émna kumsudung
Gí:dí po:nung nungkinma:mílo
Nom Boki Moné émna kumsudung.
Mimé no asin rémagné
Asi bitkolo bidmínla:né
Ésar sarkolo sarmínla:né
Gimur kísapé nokké asindé
Rémag pésagé mé:lodde.
Léko nom omépé pa:dung
Nokké ajjau:la du:dagém
Longéko nom bírmé pa:dung
Yirman so:manna sí:robdagém
Léko nom amo-yignépé pa:dung
Yame: mesa:la sí:bugdagém
Longéko nom pa:dung né:pé
Sidag turdag turjon ajonpé.
Lékoném nom pa:dung ayopé
Sí:ta sí:mala sí:robdagém
Arbiya:lo ogapsula jarsudagém.
Mimé nok dumsígém luyi:nla:mang
Nom kapé mé:la ka:yeji
Nom édémí:pé ka:dung mo:píso.
Mimé no asin rémagné
Asi bitkolo bidmínla:né
Ésar sarkolo sarmínla:né
Gimur kísané asiné
Rémag pésagné mé:loddé.
Mimé no asi gorgorné mukkangé
No mé:ngkodo:péi yi:ladag
Guné do:nyitémté yi:tídla:dag.
Aglíng jírrí:ngémsin medladag
Ansi:né asipé ré:yi:ngo:pé
Aíé aki jinkitsudaggom
Ommangém gabbola du:bomang
No ki:né na:néké akamé.
Mimé nokké yenamdém lungabla:mang
Yenam yenamlo du:nam du:namlo
Mé:dír ngasodém metsi:la:dag alangémpé.
0 Comments